今季喺英格蘭球壇威到盡，捧走英超、英足盃及英聯盃，成為本土三冠王嘅曼城，最近有消息傳出為咗延續王朝，決定向領隊哥迪奧拿開出五年新約，而年薪仲會加到去每年2,000萬鎊（約2億港元），誓要以銀彈攻勢留住呢位帶領曼城衞冕英超嘅總舵手。
高路普都傳續約五年
根據英國《太陽報》報道，48歲嘅哥迪奧拿雖然同曼城仲有2年合約，不過為咗令到佢繼續留喺藍月，決定向對方開出一份5年總值1億英鎊（約10億港元）嘅合約，年薪由目前嘅1,500萬鎊大幅增加到2,000萬鎊，成為全球第二高收入嘅教練，只係僅次於馬體會嘅施蒙尼。
的確，曼城喺哥帥嘅帶領之下，慢慢進化成一流嘅班霸，而且橫掃英格蘭球壇。雖然佢對外表示非常滿意家陣喺藍月嘅工作，無意去意甲上任祖雲達斯教練一職。不過，熟知哥帥嘅球迷都知，哥帥係一位非常有自己諗法嘅領隊，當佢認為一個崗位再冇挑戰嘅話就會走人。當初喺巴塞同埋拜仁都係咁樣，所以亦難怪曼城嘅管理層同球迷咁擔心。
除咗哥迪奧拿，唔少英超領隊嘅身價都水漲船高。連續兩年帶領利物浦殺入歐聯決賽嘅高路普，據報紅軍已經準備好再同呢位德國籍領隊續約五年，人工亦會去到1,000萬鎊（約1億港元），再加其他獎金。另外，同樣帶隊殺入歐聯決賽嘅熱刺領隊普捷天奴，本身喺球隊已經逗緊850萬鎊人工，係其中一位高薪教頭，但有傳祖記求才若渴，出到1,200萬鎊年薪嚟撬人，認真誇張。
曼城職員high爆剝光豬
講番曼城，話說佢哋上星期六捧走英足盃後，全隊上下當然high爆，其中球衣管理員艾斯頓更加幾乎剝光豬，除剩條底褲咁慶祝。一班球員仲將啲香檳噴落地下，然後畀條跑道艾斯頓用個肚腩滑行，認真搞笑。呢位阿哥唔止喺更衣室，喺返去曼徹斯特嘅飛機上面都繼續剝光豬，喺機倉入面捧住獎盃興奮慶祝。
