法國職業球員工會（UNFP）周日公佈各大獎項結果，巴黎聖日耳門（PSG）前鋒基利安麥巴比成為大贏家，榮膺法甲年度最佳球員、連續三年當選法甲最佳年輕球員同入選法甲最佳陣容。不過，麥巴比領獎時嘅感言就惹嚟佢將會離隊嘅揣測。
麥巴比領獎時話︰「呢個對我係一個非常重要嘅時刻，我諗已接近職業生涯第1個或者第2個轉捩點，都係時候去承擔更多責任。我希望係繼續喺PSG，或者去其他地方接受新嘅挑戰。」
麥巴比之後喺混合採訪區接受訪問嗰陣重申：「我講咗我要講嘅嘢，當你身處一個咁嘅活動，你可以發出一啲訊息，我已經表達咗我嘅諗法。如果我再多講，就太多喇。咁成件事就唔同晒，唔係我想傳遞嘅訊息。」麥巴比自16/17球季喺摩納哥冒起兼贏埋法甲冠軍嗰陣，就成日被傳會轉投皇家馬德里，但最後加盟咗PSG。
周日頒發嘅其他主要獎項，包括里爾嘅加迪亞獲選最佳教練，里爾門將邁治蘭當選最佳門將，效力皇馬嘅賓施馬就當選最佳海外法國球員，仲有已退役嘅杜奧巴獲頒榮譽大獎。