大馬首富郭鶴年有八個子女，最小的女兒郭燕光現年29歲，在溫室長大的她，性格爽朗，她眼中的父親，有巨大遠見，好明智，母親不夠虎媽，讓她未至臻美，「有啲嘢通常要管嘅又唔管，有啲好隨便嘅就好執着」，像在訴說母親不接受其男友不是中國人，她有所難為。
採訪：羅慧敏
攝影：周樂恒
郭燕光近年活躍社交圈，是家中的掌上明珠，父親「糖王」郭鶴年是嘉里建設、嘉里物流與香格里拉（亞洲）等上市公司的老闆，今年《福布斯》評估這位大馬首富的身家達128億美元（約998億港元）。
愛運動做隱士
29歲的郭燕光說：「靚女、叻、醒目blah blah blah，有梗係好啦，但有唔代表成功，我好想mental and spiritual stay（心靈與精神的安穩），可以唔受外界影響，唔理別人評論，令自己處於一個舒適狀態，信任別人，成個人好淡定，為他人犧牲，呢個先係一個成功女性，但我未去到，我成世人都會好努力追尋。」郭燕光給人印象很鬼妹仔性格，但她不愛蒲，不愛酒，她熱愛運動，也愛做隱士：「我鍾意留喺屋企，唔鍾意出街，好似隱士咁唔出嚟，呢年好鍾意運動，每日都做。」
這位名門之後，沒有被寵得傲慢，反之性格爽朗、誠懇有禮，她心目中父母又是怎樣，郭燕光想了想說：「每個人都會視父母為榜樣，阿爸係好明智，佢睇嘢係big picture（長遠看整體局勢），計晒長遠有乜後果，對我嚟講佢畀我有關生活、生意，甚至男朋友等所有嘅意見，我都會好注重。媽咪反而比較衝動，講少少就嬲、唔想同我講。」郭燕光父母給她最好的，中學讀傳統名校女拔萃，史丹福大學畢業，是名優異生，大家以為她從沒有挫折，其實錯了，追求完美的她希望父母更嚴厲，她說：「其實我都好想有自己嘅family，會諗番父母當時點管我，有啲嘢通常要管嘅又唔管，有啲好隨便嘅就好執着，好似學校嘅成績，佢哋完全唔理，但瞓覺時間就一定9點半。」
自己會做虎媽
郭燕光續說：「媽咪對零用錢好嚴格，好有趣。不過𠵱家諗番，覺得當時束縛啲、更加嚴會更好，我三歲已經開始學彈琴，如果一路繼續，去到小學應該可以去到演奏級，不過自己懶，斷斷續續，去到中學時仍然係三、四級，我唔想彈，媽咪就畀我唔彈 ，但如果佢繼續逼我，我可以好好哋將佢完成，喺女拔中學，身邊嘅同學都演奏級，我上到台仲會好緊張咁，真係希望我媽管得嚴啲，做tiger mom係好過太放鬆，可以逼佢哋發掘自己潛能，好過長大唔出色會怨父母，畀我寧願做tiger mom。」
諗定婚後計劃
提到英國籍男友Jack，郭燕光坦言3月才正式拍拖，郭媽媽還未接受男友，她坦言拍拖兩個月已有結婚計劃，「我哋真係有傾將來，我都29歲，之前單身咗四年，難得遇到真命天子，都想呢幾年結婚，我已經諗好晒，想生一個女兩個仔，要個美滿嘅家，」她續說：「Jack喺香港出世、長大，之後返英國讀書，再返香港做嘢，係個傳統嘅英國家庭，思想老土傳統，都有啲似中國人。爸爸好open mind，佢哋見過兩次，佢會同我講Jack好大隻，話驚佢年長時身體有乜嘢不適，真係諗得好遠。我媽好反對非中國人，阿爸有一次話叫四個一齊食飯，阿媽聽到之後嗰日就去咗深圳，我都想阿媽接受，但如果唔發生都冇辦法。」
場地提供：Tram View Cafe
【網店功成身退】
郭燕光是個倔強女生，其格言是：「每件決定咗做嘅事永遠都唔會放棄，我唔理要捱夜、出幾多血汗，唔可以失敗，一定要成功！」2016年創業開創二手時裝網店Guiltless，最近公司與中東最大的網上二手平台The Luxury Closet合併，衝出海外，她說：「係好消息，咁啱佢哋嘅創辦人想將生意擴展到中國，佢哋覺得我哋業績好，我哋合併咗，所有嘢都會二合為一，𠵱家我會睇吓香港有乜可以幫到發展。」
要返家族幫手
一手湊大的baby有更好發展，郭燕光一邊廂是開心，另一邊廂又相當不捨，她說：「我會覺得自己係個單親母親，有咗BB，好愛佢，為佢付出所有，不過突然有對有錢老夫婦想領養小朋友，確保佢可以上最好嘅學校，乜都最好嘅，對於BB嘅未來係應該嘅，但好唔捨得。」問到會否繼續籌備另一生意？她決意say no，「我要休息！阿爸好想我加入返家族生意，佢又開始嘈我，佢好想我快啲返去，幫手做公司嘅investment team。」
更多精采時尚內容，盡在 http://add.appledaily.com。