球王去到邊度都係最佳，34歲嘅基斯坦奴朗拿度（C朗）今季轉投祖雲達斯，第一季就喺意甲射入超過20球，幫球隊贏到聯賽八連冠，當選今季意甲最佳球員可以話係實至名歸，佢亦係史上唯一一位球員先後喺英超、西甲同意甲都當選最佳球員，認真犀利。另外，領隊艾基利落實季尾會離隊，C朗都有喺twitter度送別佢。