公民黨噚日搞傳媒茶敍，介紹8位扎根社區嘅地區發展主任，席間宣佈上屆區選為公民黨力保康怡選區、現時身兼民陣副召集人嘅梁穎敏，因為身體問題唔再尋求連任。積極考慮「臨危受命」代替梁穎敏上陣硬撼保皇派嘅，會係現時任職資訊科技顧問、過去一直有喺梁穎敏，以及梁穎敏「師傅」陳啟遠議辦幫手嘅魏志豪（Derek）。
Derek自爆十幾年前差啲入咗建制派，但2008年接觸過民主派莫乃光後對民主派改觀，慨嘆當年有啲年少無知。Derek話無論最終係咪出選，佢都喺康怡花園生活咗10年，好希望可以服務居民。
中小學都讀男拔萃、有啲似大隻版AY嘅李煒林（William）就喺英國讀完法律後冇做律師，喺國際學校做體育教練，現時喺麗港城做地區工作。除咗有名校出品，仲有做推廣公司董事、現時服務九龍塘選區嘅溫仲然（Matthew），同埋考慮出戰「紅區」啟德嘅女將梁咏欣（Sandra）；至於現時任職數據分析員嘅雷啟榮（Stanley）或會挑戰建制派區議員龐愛蘭。
除咗專業人士，公民黨有個社區主任連風水面相都識！佢就係任譚文豪議助、喺淘大服務嘅李軍澤，阿澤話術數大師林真（原名李國柱）係佢家族成員，唔少街坊都搵過佢幫手為BB改名。