樂隊Mr.前晚喺紅館舉行演唱會，開場時大銀幕播出呢十年間發生過嘅事，包括雨傘運動、立法會宣誓風波等。唱到第二首歌嗰陣，觀眾已經企晒起身，主音Alan即刻話：「我想同保安講，我哋個騷係畀佢哋企起身，放佢哋一條生路啦！」
感激Eason阿倫
成員分享各自感受，Ronny講到當初掙扎過係咪入行：「當時諗，40歲時想要一架跑車定一張樂隊CD，今日我買唔起一架跑車，但我擁有11張樂隊CD。」Dash就話同Mr.一齊係自己最開心嘅事。鼓手Tom話：「大家有冇睇過《食神》？主角史提芬周最低潮、最唔開心時，有碗黯然銷魂飯。Mr.都有碗黯然銷魂飯，佢就係Jerald（陳哲廬）。每個人經歷過高低潮，我都希望你哋有自己嘅叉燒飯。」跟住Mr.唱出《不屈》送畀演唱會音樂總監Jerald。
Mr.完騷後出席慶功宴，鼓手Tom前排腰傷，佢話演出時唔覺痛，但完騷後手同背都好痛：「我有個綽號叫唔留手，十年真係好難得，所以更加唔可以後悔、留手。」講到感謝Jerald，Tom自爆喺沖涼時諗起：「見到Jerald，就諗起Jerald，哈。」Alan就特別感謝譚詠麟同陳奕迅（Eason）：「Eason秘密嚟睇，畀咗好多意見我哋。最開心係離開咗舊公司，都有好多前輩愛錫我哋。」而阿倫就約食飯支持。問到Mr.會唔會再簽唱片公司？Alan即刻話唔會，MJ覺得繼續夾band最重要，而且控制權喺自己手。
撰文：馮仁昭
