香港市民現時最關心嘅，相信包括惹嚟國際關注、港人他朝有可能被移交至司法唔健全嘅中國受審嘅《逃犯條例》修訂，但相信對特首林鄭月娥而言，習大大最緊張嘅大灣區先至係佢最上心嘅事，否則點會懶理13萬人上街怒吼反修例之際，仲有時間北上推介假大空，甚至叫傳媒多啲講好大灣區故事，有網民揶揄「講好大灣區故事」不如「作好大灣區故事」，又警告如果《逃犯條例》修訂通過咗，港青仲敢走進大灣區？「講幾多故事也是廢話」。
教記者採訪做專題
如果唔係要sell大灣區，相信林鄭都未必願意「讚」香港記者出咗名拼搏，佢噚日喺廣州舉行嘅粵港澳大灣區媒體峯會致辭時話喎，相信記者會喺大灣區搵到並做到豐富多采嘅報道，仲具體教路話可以透過文字、影視、網頁等多媒體傳播大灣區資訊、進行專題研究、邀請專家評論，以及進行人物專訪，尤其係喺大灣區創業嘅港澳青年，以活生生例子講好大灣區故事，同時又話傳媒有監督政府、提出社會問題嘅天職，只要係客觀持平、講事實嘅報道，都會獲得認同。其實唔少傳媒目前都有以林鄭上述所指嘅方式，以活生生例子講出《逃犯條例》嘅問題，唔知林鄭又有冇留意到？
同樣出席峰會嘅中聯辦主任王志民致辭時就話，留意到大灣區規劃綱要2月出爐後，香港媒體嘅相關新聞報道同解說文章超過5,000篇，亦引述有調查話港青對大灣區嘅認識度提升咗25%；八方唔知王主任所指嘅報道文章包唔包括「非唱好」類別？但王志民若咁重視媒體報道，不妨睇睇《逃犯條例》修訂嘅報道同解說文章（當然係包括埋批評意見），或者會有新領悟。
李八方