曼聯今季喺領隊蘇斯克查坐正前後，戰績出現極大對比，頭11場贏10場，但季尾各賽事最後12場得2勝2和8負，表現大跌之謎，據ESPN引述消息人士就有答案，佢哋話蘇B同菲倫一早唔滿意大部份球員嘅體能狀態，所以操練一路加辣，初初就有好效果，但好快就換嚟球員乾塘嘅反效果。
想谷體能反而操爆偈
蘇B同菲倫喺上年12月中以救世主姿態去到紅魔，頭11場波贏足10場，走勢極之凌厲，成隊喺摩連奴麾下頹爆嘅波，好似變晒身咁，3月6號歐聯作客奇蹟擊敗巴黎聖日耳門晉級8強去到頂峯，之後就一路回落，季尾最後12場比賽輸足8場，最後歐聯八強出局，聯賽只排第六，緣盡來季歐聯。
福仔嫌冇前景唔續約
消息人士指，蘇B認為最大問題就係球員嘅體能狀態唔掂，季中勉強催谷之後，季尾就出晒事，所以佢就要求球員喺7月1日返去卡靈頓訓練場報到嗰陣，體能狀況就要夠弗，而曼聯都安排咗「暑期功課」畀班球員，放假都要繼續操，仲話如果唔夠弗，就唔使參加澳洲同亞洲之旅！曼聯7月7日會飛去澳洲，分別友賽珀斯光輝同列斯聯、然後去新加坡鬥國際米蘭、再去上海對熱刺、然後返威爾斯卡迪夫對AC米蘭，新一季英超就喺8月10日開鑼。
雖然蘇B好多大計，但球員睇唔睇佢台戲都好緊要，21歲紅魔青訓出身嘅前鋒拉舒福特，據報就擔心球會前景唔明朗，所以剩番一年約嘅福仔，家陣就唔同曼聯傾住。據報福仔唔多睇得起蘇斯克查嘅領軍能力，而且保羅普巴同迪基亞等幾個重心球員，今個夏天去向仲係一個疑問，普巴成日傳去皇家馬德里，迪基亞亦都唔肯續約，所以福仔喺傾新約前就想睇定啲先。對曼聯嚟講，好彩嘅係可以啟動福仔自動續約一年嘅條款先，係咪都留住個人，話晒福仔家陣周薪得4.5萬鎊，唔止係紅魔主力入面最低，直情係紅魔一隊入面第五低嗰個，點都係抵玩吖！