母親節已過，但如果有心，日日都是母親節，因為媽媽每一日也充滿愛地照顧子女。若非充滿愛，為何每朝返工前提早起身製作公仔便當再送返學？阿女要求？愛心媽媽Anna：「唔係呀，想佢食得開心啲咋。」好啦，我今晚都要返屋企食飯，辛苦你喇阿媽。
6歲女兒叫豆豆，上年升讀小學一年級，媽媽不想她每日捱飯盒，惟有親自出手。由上年10月開始，Anna每日製作愛心公仔便當，同時影相放上Instagram留個紀錄，留個回憶。Anna說：「佢大部份同學都有工人姐姐中午拎飯畀佢哋，但我要返工，又唔想交畀姐姐，所以就早啲起身整，之後送佢返學。」咦？不是乘搭校車嗎？「放學先搭校車，因為朝早搭校車，佢要早半個鐘出門口，咁畀小朋友瞓多半個鐘啦，你都明朝早瞓多三幾個字有幾重要嘛。」我明，我電話鬧鐘是0745第一次響，之後0800，再之後0815，最後0830，但我朝朝都是0900才起床。
工人姐姐只洗碗 「個廚房係我嘅」
讓女兒多睡半小時，但Anna自己就要清晨5時多起床準備便當。「通常之前一晚會諗定整乜，睇吓雪櫃有乜材料，盡量都日日買餸，新鮮啲嘛。」做地產工作的Anna，每朝早送完阿女返學就回家，換件衫就再上班，下班後就買菜準備晚餐。工人姐姐呢？「個廚房係我嘅，唔想交畀其他人。」說穿了，不過是想每餐都親手製作便當，讓阿女可以食餐好。「有工人姐姐，可以幫手洗碗清潔，已經幫輕咗。」
Anna製作的是非一般便當，營養豐富是基本，最重要是色香味俱全，有時是卡通人物，有時是動物，又剪又貼又切又砌又有擺位，美得像一幅立體圖畫，絕對是心思之作。便當造型天天不同，哪來這麼多點子？「會上網睇吓，參考吓人哋作品，又會睇吓佢鍾意乜卡通，就做畀佢食，佢好鍾意啲樣衰衰嘅角色，都好嘅，易整啲。」例如《我們這一家》，或《忍者亂太郎》，咦？《忍者亂太郎》是這個年代的？「有時想同佢一齊睇卡通，會揀啲我都鍾意嘅，所以佢都有睇。」
說到最困難，Anna說是製作人臉，「兔仔呀，貓仔呀，熊貓呢啲都比較易處理，不過一整人樣就好麻煩，好難整得靚，所以避得就避。」此外，要留意的事比我們想像中多，「因為係朝早畀佢帶返學，所以要係可以凍食嘅材料，或者唔會容易變壞嘅材料，而且學校都有自己規矩，唔可以帶湯類嘅嘢，驚倒瀉整親，連多啲汁都唔得，試過整過一個忌廉汁蟹餅，因為忌廉汁多咗啲，之後就畀老師寫手冊。仲有，唔畀帶箒喱，呢個我都唔知點解。」
營養均衡亦是考慮，Anna說：「都有買啲書或上網睇吓用乜材料好，盡量都要多啲菜，有時食魚有時食肉。」阿女最愛呢？「漢堡扒、銀鱈魚、牛油蒸帶子。」豆豆相當識食。
女兒愛上烹飪「煮食當中學好多」
豆豆識食，因為食得多，又成日見媽媽入廚，培養了烹飪興趣。Anna說：「而家每逢星期日嘅午餐都係佢煮，由佢發辦。」小學一年級煮飯？「係呀，一年級識好多嘢喇，廚房有張凳仔，就係畀佢企高整嘢，當然我都會喺隔籬睇住嘅，但盡量都畀佢自己發揮。佢整過好多嘢喇，有漢堡扒啦，有時又會包餃子。」
這算是興趣班？「係，我覺得小朋友應該畀佢玩多啲，我哋以前放假都係全日去玩或者喺屋企睇電視啦，所以除咗學畫畫同每星期一堂英文外，都冇逼佢上啲興趣班。佢話想學煮嘢食，試過畀佢出去學整甜品，但其實整返嚟大家都覺得太甜唔太好食，咁不如我自己教，煮到啲佢同爸爸媽媽都鍾意食嘅嘢，開心啲，佢滿足感又大啲。」Anna說學烹飪好處多，「喺煮嘢食當中，可以學到好多嘢，例如分配時間，整理每個工序嘅步驟，除咗佢自己興趣畫畫，學啲第時有用嘅嘢，係咪好啲？」對，有幾多個小朋友長大後會打非洲鼓？
IG : @chingching_mami
記者：陳孝義
攝影：鄧鴻欣
部份圖片由被訪者提供