隔牆有耳:馬丁訪美有cake賀壽 最緊要「撤」 - 李八方

隔牆有耳:馬丁訪美
有cake賀壽 最緊要「撤」 - 李八方

現正訪問美國、呼籲國際社會反對今次《逃犯條例》修訂嘅民主黨創黨主席李柱銘(Martin),下月8號係佢嘅81歲生日,雖然有一排先到正日,但訪問團決定提早喺美國同馬丁慶生,除咗有李卓人、香港眾志羅冠聰、記協前主席麥燕庭外,佢哋仲等埋《逃犯條例》法案委員會主席涂謹申、同埋公民黨立法會前議員吳靄儀,一齊喺華盛頓一間餐廳切蛋糕慶祝。

雖然慶祝生日咁開心,但其實訪美團仲有幾場重頭戲,好似佢哋仲要見眾議院議長佩洛西(Nancy Pelosi)同美國國務卿蓬佩奧(Mike Pompeo),佩洛西可算係香港同馬丁老朋友,過去咁多年都好關心香港民主同人權。

吳靄儀阿涂加入戰團

之但係,今次會面再加埋吳靄儀、涂謹申呢兩位猛將都會加入,希望游說美國要更積極發聲。呢場反送中條例嘅硬仗,民主派猛將個個歸位,把守不同崗位,希望最終令政府撤回惡法。

李八方