蔣祖曼最近在新劇中演黑幫女友，已入行近20年的她，回想當年辛酸，要邊做侍應邊拍戲養家，捱了七年才轉做全職演員。現已有自己家庭的蔣祖曼，除有一名女兒，同時要照顧丈夫跟已故前妻生的兒子，對她來說樂也融融。
撰文：羅慧敏
攝影：陳俊強
現年33歲的蔣祖曼近日在無綫劇集《鐵探》中扮演黑幫女友，其實她已入行近20年，早於2001年讀中四時，已拍人生首部港台電視劇《Y2K》，最後為興趣加入影圈。蔣祖曼日前接受《蘋果》專訪時說：「老土啲講我鍾意拍戲，真係因為興趣，我攞到嘅係快樂。」
遇上伯樂
蔣祖曼表示中學畢業後，因為家中經濟環境不好，未有立即入行，她說：「我係要做嘢，同時拍獨立電影，我覺得好幸運，我嘅機會比其他人多，唔理係唔係大製作，好多機會學到唔同嘅嘢，先行到𠵱家呢一步。」兩邊兼顧一做便七年，直到2011年才辭去餐廳工作，投身舞台劇，此時遇上伯樂白只，蔣祖曼說：「演舞台劇係好深學問，我好好彩，遇到一班肯教嘅演員導師。白只由我係一個舞台劇半新手到變成另一個人，完全係佢嘅功勞。」蔣祖曼謂期待跟影帝劉青雲合作。
視如己出
2014年蔣祖曼跟電影幕後陳卓麒結婚，而丈夫與已故前妻誕育有12歲兒子陳滌，蔣祖曼待繼子如己出，婚後她為丈夫誕下女兒，囡囡現已3歲大，家中又有養寵物，變得非常熱鬧，蔣祖曼說：「兩個小朋友加埋屋企九隻貓、一隻狗、兩隻龜同一隻雀，我對生活冇要求，全家一齊已好開心。」她表示跟繼子關係甚好：「我同大仔關係仲好過同囡囡，其實兩個都friend嘅，有啲人會問我咁辛苦，又要照顧小朋友又要養寵物，其實我成日覺得唔諗佢就做到，對任何嘢都係出於愛。」
化妝：Jess Yung
髮型：Haffman Cheng
場地提供：九龍貝爾特酒店