最近立法會立立亂，但要審議嘅事都係要繼續，就好似財政預算案咁，噚日就排到上大會，等住完成全體委員會審議同三讀通過。財爺陳茂波當然有份列席，不過對住16個議員、提出合共156項修正案，就算主席剔除咗14項，都仲有百幾項，波叔等過關真係等到頸都長，八方噚日朝就發現坐喺會議廳嘅波叔，聚精會神低頭篤電話，原來佢忙住用WhatsApp發短訊畀議員箍票！箍票呢啲粗重工夫都要自己做，唔知係波叔信唔過下屬，定係坐得耐驚眼瞓？
不過，其實波叔每個短訊內容實際上係一式一樣，只係喺最開頭好「細心」咁改接收人個名，佢首先問候對方，話呢幾日議會工作辛苦喇，百忙之中都嚟打攪真係唔好意思，因為預算案最快聽日黃昏前後就可以投票，溫馨提示議員到時記得投票支持，仲不忘加句：「你的肯定，會鼓勵我們整個團隊繼續全心全力為香港打拼」，真係動之以情㗎！
據八方所見，建制派班長廖長江、經民聯梁美芬、新民黨葉劉淑儀、民建聯陳恒鑌，仲有民主派嘅衞生服務界李國麟都收到波叔嘅溫提短訊。貴為每個月𢭃緊差不多36萬公帑嘅司長send短訊畀你喎，真係名副其實字字值千金！