馬德里體育會周二突然喺twitter掉出震撼彈，宣佈隊內王牌前鋒基沙文會喺今夏離隊，而且仲有埋對方獨白嘅短片，正式同馬體會球迷道別。
人人都估基沙文應該會轉投同佢一直扯上關係嘅巴塞隆拿，如果呢單交易成真，今夏一班7號仔隨時大執位。
有傳早有協議去巴塞
今季篤定以亞軍完成聯賽嘅馬體會，周二突然喺官方twitter度話「基沙文已經向球會表明，佢下季唔會再係馬體會球員」，之後再po多條短片，條片全部都係基沙文嘅獨白，正式向球迷道別。佢喺條片度講：「我決定離隊去搵吓唔同嘅挑戰，過去五年同球會贏咗好多重要嘅獎盃，多謝你哋畀我嘅一切，我永遠都會將你哋放喺心中。」
雖然馬體會或者基沙文本人都冇宣佈會去邊度，但一般相信呢位法國射手下站就係巴塞。西班牙傳媒話，其實三方都一早傾掂數，不過基沙文一向對馬體會有情有義，就算舊年夏天已經想走，但怕球會收唔到好多轉會費，所以先同球會續五年長約，換嚟下年馬上放人嘅條件。
另外，上年簽約嗰陣解約金去到兩億歐元，但去到今年7月1號就會跌到1.04億歐元（約9.13億港元）。不過馬體會就唔會袋足呢筆錢，因為有兩成要分畀佢前球會皇家蘇斯達，但為改善成績，佢哋今夏一樣會豪爽，有傳已經吼中赫達靴里拉、阿歷士迪尼斯同菲臘比蒙達里奧三位波圖球員。
基沙文如果真係轉投巴塞，咁家陣喺巴塞踢得唔愉快嘅7號仔菲臘比古天奴，好大機會好似之前傳咁，重返英超轉投曼聯。不過佢舊東家利物浦一定唔會想呢件事發生，除咗因為紅魔係死對頭，佢哋仲會因為咁而收少咗錢，事關如果古天奴為巴塞上陣夠100場，紅軍可以額外收多2,000萬歐元。
紅魔踢走山神簽古仔
紅魔要簽古天奴，就要先諗計踢走佢哋失敗嘅7號仔阿歷斯山齊士，最壞打算係賠償多1,200萬鎊畀呢位隊內最高薪球員，寧願同佢早早解約，反而安東尼馬迪爾就傳因為好受老闆之一嘅祖爾格拉沙寵愛，就算領隊蘇斯克查幾不滿，都郁唔到呢位23歲翼鋒。