前英超球會保頓（白衫）早前就爆出冇錢出糧等問題，球會牧師近日就設立緊急食物銀行，為已經兩個星期冇糧出嘅球會員工提供生活必需品。球隊牧師Phil Mason就話：「我哋嘗試去提供一啲生活必需品畀員工，幫助佢哋可以繼續過啲正常嘅生活。呢度有好多員工過去兩個禮拜都冇糧出，咁樣好難可以維持到基本嘅生活開支，好多謝慈善機構提供食物畀大家，等佢哋可以捱過難關。」保頓喺三月已經試過拖欠職球員份糧，仲令到班球員唔肯上場，結果搞到主場對賓福特場聯賽要延期。球隊今季喺英冠只係排尾二，下季要降落英甲，仲要被扣12分，加上又再次拖糧，相信球迷同員工嘅心情都一定唔好受喇。