八方發覺建制派何君堯真係好鍾意出嚟搞笑，日前佢就自爆手提號碼，吸引大批民眾打去叫佢「食屎」。噚日佢又有新搞作，話說佢見民主派就預算案提修訂，要求減特首林鄭月娥人工，何君堯就唱反調話加林鄭人工先啱，仲要當晒班司局長係酒樓侍應、甚至泊車仔，話做得好應該要有打賞喎！
噚日立會辯論預算案，講緊減娥特同司局長人工，港大民研最近嘅民調顯示，娥特民望創新低，換轉喺私人機構打工，出糧畀佢嘅老細、即係納稅人，唔滿意員工表現，減薪炒魷天公地道！
指民望低因民主派衝擊
但何君堯噚日發言時提到，佢話娥特民望低因為民主派議員衝擊、挑剔，用暴力阻撓修訂《逃犯條例》，唔關娥特事，仲話反而覺得娥特咁辛苦，要加佢人工。跟住佢連司局長人工都玩埋，話出年佢考慮動議問責官員做得好，要打賞吓佢哋，即係加人工。
首先呢，何議員，議員提嘅修正案係唔可以增加政府開支，所以加人工方面係做唔到。至於司局長表現好就要打賞方面，何君堯嘅諗法咪就係肥上瘦下囉，再者「打賞」嘅意思係身份尊貴嘅人畀賞賜低層或者下屬，乜何君堯覺得司局長係自己下屬咩，係佢嘅秘書、泊車仔、定係工人呀？
李八方