阿士東維拉（圖）爭升班仲差一步！佢哋周二晚喺英冠附準決賽次回合作客西布朗雖然輸0:1，但兩回合計打和，兩軍加埋時都分唔到勝負，最終維拉互射12碼贏4:3，率先躋身附加賽決賽。維拉首回合主場以2:1反勝西布朗，但周二晚作客就入唔到波，全場唯一入球出現喺上半場29分鐘，西布朗一次手榴彈戰術，由中堅奇治戴臣頭槌頂向遠柱得手領先，但佢哋踢到80分鐘就有布拉特兩黃一紅被逐，不過都贏1:0，兩回合計打和2:2。由於英冠附冇作客入球優惠，兩隊踢埋加時都仲係冇波入，結果要以用互射12碼嚟分勝負。西布朗先後有賀基迪同希加斯射失，至於維拉雖然亦有艾度馬唔入，但譚美阿巴謙最後一輪冇甩拖，最終贏4:3淘汰西布朗，連續兩年都打入英冠附決賽。