啱啱衞冕英超嘅曼城，領隊哥迪奧拿喺周二就蟬聯英格蘭聯賽領隊協會（LMA）頒發嘅英超最佳領隊獎項，但球隊近期亦是非多多，除咗歐洲足協指佢哋可能違反財政公平競技（FFP），想褫奪歐聯參賽資格外，班球員仲因為涉嫌慶祝封王時，惡搞歌詞羞辱爭標對手利物浦，惹嚟唔少批評。
先講48歲嘅哥迪奧拿，佢今次喺LMA嘅選舉中再次力壓高路普同普捷天奴，連續兩年當選英超最佳領隊，但計埋各級別嘅年度最佳領隊獎項，哥帥就輸咗畀英冠錫菲聯嘅韋爾達。不過，以隊長高柏尼為首嘅一班曼城球員，近期就被影到喺飛機上慶祝嗰陣，惡搞紅軍球迷創作嘅歌，將啲歌詞變成恥笑對手嘅內容，而且仲幾過份咁涉嫌嘲笑希斯堡慘劇同上屆歐聯有紅軍球迷遇襲等傷心史，俾對方球迷怒斥行為可恥，但球會就出官方聲明反駁指控冇根據。
講起紅軍，雖然佢哋英超就爭輸咗畀曼城，但嚟緊仲會喺歐聯決賽鬥熱刺。不過賽前就有個壞消息喇，事關歐洲足協宣佈咗呢場波會由史高文拿執法，呢位球證可謂係球隊剋星，原來佢過去曾經吹過五場利物浦嘅比賽，當中紅軍只係贏過一場，就係今季歐聯小組賽主場對拿玻里嘅生死戰。