【黑鏡線索】
同朋友A朋友B聚會，朋友A話佢做緊個side project，提出好多問題叫大家畀意見。
完咗之後，我心裏有條問題，點解朋友A對個side project，好似仲投入過原本間公司？事關，朋友A有間startup，做咗好幾年，未係好成功，但至少近年摸到條路，可能可以做大。正常去到呢個關頭，應該踩盡油至係。
當然，有件新玩具，貪新鮮覺得好玩啲，呢個好正常，唔難明。但朋友A個side project已經做咗一輪，又唔似係純粹貪新鮮喎。同埋朋友A本身幾踏實吓，唔覺得佢玩玩吓。到底點解呢？點解唔將成副心機擺落原本間公司度呢？
結婚有壓力 加薪要問投資者
朋友B話，其實唔係咁難明。佢話：
「佢原來間startup，有raise錢有投資者，係咪？佢raise嘅時候，係咪一支公未結婚？咁一支公，冇乜使費，公司又燒緊錢，唔會出好多糧畀自己，好正常啦！」
「但係，呢幾年，佢又結婚，又生埋仔，使費肯定多咗好多，以倍數升，所以每個月take home嘅錢，當然係有向上升嘅壓力。」
「舉個例，take home嘅數額，需要多兩倍。問題係，嗰兩倍喺邊到走出嚟？加人工，點樣同投資者講，想加自己兩倍人工？佢哋會話，我哋投錢入嚟你間公司，係想啲錢用嚟加快增長，唔係畀你加人工畀自己。」
「一係就派bonus，或者派息。前提係，至少要有錢賺先得，而家間公司仲燒緊，唔使諗。好喇，當CEO做到有錢賺，咁投資者就話，我哋當初入股，係要十倍以上回報，唔係要收息。有錢賺就倒返落去燒，唔好派出嚟。」
「即係話，就算佢努力令公司有錢賺，佢嘅take home仍然唔會大變，因為佢關心嘅take home，投資者唔關心， 大家嘅立場唔同，甚至有衝突。同樣道理，如果你同好有錢嘅人合股，但你好等錢使，一樣有衝突。佢嘅問題係現金太多，你嘅問題係由公司現金太少，變成個人現金流太少。」
raise錢千萬上億 不等於發達
「就好似，行外人睇raise錢新聞，幾多千萬幾多億，會覺得founder發咗達，但行內清楚，valuation唔可以用嚟開飯，唔可以去銀行抵押，投資者投資嘅錢，唔可以用嚟買尿片，交國際學校學費。」
「所以你見佢個side project，講到明唔raise，咁樣佢賺多嘅每一蚊，都有權用嚟幫補take home。所以特別上心，唔係冇原因。」
哦，明晒！
撰文：宋漢生