體育人訪:英雄輝 上半場

體育人訪:英雄輝 上半場

香港足球代表隊首席守門員葉鴻輝,上月在社交平台貼文宣佈求婚成功,明年與拍拖兩年多的女友Christy結婚,有傳媒以「封盤」來形容這位前足球先生做「老襯」。
葉鴻輝也確實是球圈筍盤,也是港隊及東方龍獅主力,早開始規劃將來;出道不久便進修,近年報讀教練班,兩年多前決心上車為將來組織家庭。雖然球市持續不景,港隊熱也漸退,但他認為如配合天時地利,還有機會經歷另一次高潮。靜待港隊熱重臨,但「英雄輝」不希望再有特首候選人為選舉拉票,而「消費」港隊操練時間。
記者:曾雁平
攝影:曾憲威

回望過去:「每次比賽就睇邊個俾人X」

代表香港出賽,是不少運動員的夢,葉鴻輝2010年晉升大港腳,只是入選初期,隊友並不熱忱代表港隊。「啱啱入港隊,原來好多隊友唔想踢,因為踢成點都會俾人鬧,尤其係主場,每次比賽就會睇今場邊個俾人X。作客冇球迷,表現就肯定好啲,因為比較放。以前入選要俾人鬧,真係吃力不討好,入選有乜用?可能係同球會傾約嗰陣可叫高啲個價。」

「港足主場贏東亞運,10年亞運又入16強,上屆世盃外又出現難得嘅熱潮,家陣代表港隊,認受性大過以前,港隊啲波好耐冇試過爆棚,不過世盃外連續四場坐爆旺角場,球員就更落力,因為唔想球迷失望;有一刻諗過,點先可以保持呢種熱度,但知道冇可能,呢兩年熱潮已經過咗。過去10年,東亞運係香港足球第一次熱潮,世盃外係另一次,不過近期就冇,香港睇運動同足球嘅唔太多,家陣要等另一個高潮,同埋天時地利人和。」葉鴻輝說。

入籍兵在近年的港隊扮演重要角色,這位前港隊隊長坦言,入籍兵並非香港足球長遠計劃,但要求本地球員達入籍兵的體格及對抗能力卻不大可能:「家吓香港足球環境有政府資助,但可唔可以忍受一段時間承受低迷戰績?如果得,畀後生嘅踢2、3年,7、8年後就夠料代表香港。等入籍兵幫手,就先要踢夠七季,再要等攞特區護照,前後八年,入籍兵代表得香港都過30歲,踢2、3年都可能退,睇足總高層同教練點取捨,港隊有政府資金,亦要同球迷交代,前任港隊教練金判坤都好努力嘗試平衡本地兵同入籍兵,上一任加利韋特就明顯重用入籍兵,不過外籍教練唔知留幾耐,一定成績行先,冇得講,入籍兵嘅身體質素好過本地球員,技術就差唔多,所以自然揀入籍兵,本地後生球員喺國際賽冇咩機會,經驗同能力又唔夠,港隊揀人就要睇教練取向。」

葉鴻輝(左)在華家堡嶄露頭角。資料圖片

二○一六年,葉鴻輝勇奪足球先生。
資料圖片

葉鴻輝(綠衫)在東亞運決賽,於互射十二碼領港足擊敗日本封王。資料圖片

不屑林鄭消費港足

在香港當運動員不易,還要被人利用,就更令人氣結。前年特首選舉前,當時候選人之一的林鄭月娥突然到港會場觀操,並為職球員打氣,又預祝港隊成功,當時港隊隊長葉鴻輝見這位候選人以此拉票,藉故不與她接觸。葉鴻輝坦言不明為何有人在選舉前突然現身:「點解選之前先嚟加油?喺運動員角度,自然諗到咩事,就係想拉票;個人覺得唔應該消費港隊嘅訓練時間,嚟話畀人知自己支持體育?呢個係我當時嘅諗法,運動唔係要嚟畀佢搞宣傳。」

世盃外兩和國足,葉鴻輝(左)的表現備受讚賞。資料圖片

輝(前排右)不屑時為特首候選人林鄭(箭嘴示)藉足球拉票的做法。資料圖片

人生規劃:月薪5,000到年薪過百萬

師承前港隊守門員盧國華的葉鴻輝17歲出道,首季效力港甲青春班華家堡,當時月薪是5,000元,開季不久便成為球隊正選,之後隨李健和轉會老牌球會東方;為圓職業足球夢,葉鴻輝決心放下學業,希望可在足球上創一番事業。他說:「初出道月薪係5,000蚊,當年食嘢好平,茶餐都係廿幾,物價冇家陣咁高,第2季轉會東方就搵8,000蚊,嗰時18歲,覺得可以興趣當份工,家人又唔反對,但條件係要兼顧讀書,可以食屋企住屋企,呢個月薪算係咁,所以當時就訂個目標,20歲要踢球會正選,23歲前要入港隊。」這些目標,較預期早達成。

葉鴻輝於09/10球季轉會天水圍飛馬,同年助港隊在主場奪取東亞運足球金牌,在準決賽及決賽對北韓與日本的精采演出,包括在決賽互射12碼時救出兩球,成為港隊歷史性奪金牌的重要功臣,賽後被冠「英雄輝」之名,隨後一年升格大港腳,之後一直是港隊首席門將,過去九年,合共代表香港上陣68次,還差兩場便追平李志豪代表香港70次的最多紀錄;英雄輝大港腳的代表作是18年世盃外,助港隊主客兩場賽和中國,見證另一次港足熱,過去幾季也贏過本地所有錦標,又當選足球先生,帶領東方踏足亞冠盃舞台,但這些可沒令這位球星放慢腳步,先安排時間進修學位及教練牌照外,更在兩年前置業,明年與未婚妻結婚,全是一早規劃好將來路向。

估計年薪百萬的葉鴻輝說:「近代球員退休後多數做教練,出面都有唔少足球學校,球員轉型做教練認受性係比以前高,自己暫時都會係呢個方向,始終自己熟路,亦都想培訓多啲土生土長嘅球員,等佢哋可以喺本地或代表香港踢波,呢個係將來退休後嘅長遠目標。」

現效東方的葉鴻輝(右二),操練時一絲不苟。

未婚妻Christy表示輝場外斯文又搞笑。

為將來返校園決上車

問到葉鴻輝何時想到置業時,他表示是認識女友後的想法:「早幾年見樓市係咁升,再唔買可能就買唔到。拍拖後開始諗,將來組織家庭係需要安居,買始終好過租,供完係自己嘅,租同供價錢差唔多所以就決定買。」葉鴻輝約兩年多前選擇在深井置業,因喜愛該區環境較寧靜。

為在足球事業打拼,葉鴻輝選擇放棄升讀大學,但為保障自己,在東亞運後也決定重返校園,在香港專教院修讀學位,過去幾季的休季期,也先後修讀亞洲足協C級及守門員教練牌照。他表示:「喺10年重返校園,邊踢波邊讀書係應家人要求,有學位,喺呢個年代係基本,之後再專注喺足球事業衝刺,有時間就讀教練班。其實讀書,可以識多咗足球以外嘅嘢,好似行政、管理等,對將來一定有幫助。」

葉鴻輝說:「當年專教院嘅老師,早排建議我有時間可以再讀多個高級學位,上年就決定讀埋佢,上年我仲讀咗香港守門員教練班,教練係日本嘅加藤浩男,佢教得好仔細,但唔係填鴨式,唔係要學生跟住做,而係要思考最好方法去解決,教法完全唔同,但之後要搞婚禮喇,可能要婚後再讀。」近年本地運動員在社會認受性確實較以往高,但職業運動員生涯比其他工種短,球員如何安排後路其實相當重要。