立法會噚日朝早好熱鬧，建制派搵咗批人到場撐送中惡法，呢班大媽大漢舉晒紙牌嗌幾句口號，勉強算有交戲。八方老友報料，話見到當中有人，舉起有「街市偉」三個字嘅紙牌，出動到猛人撐惡法，林鄭同建制派真係好巴閉，媲美當年689落區嘅場面。
「街市偉」都上街支持「送中」惡法？不過有人話，大媽針對嘅可能係另有其人，就係民主黨主席胡志偉，所謂「街市偉」，可能係諷刺胡志偉上星期喺議事廳怒罵林鄭「八婆」，創下首個特首被罵八婆歷史，而近日西環不斷發功，喉舌《大公報》社論指「胡志偉必須為惡言向特首公開道歉」，指胡志偉「冇品」，完全違反作為議員應有品格同道德操守，仲話立會其他議員，應該對佢作出譴責、追究，更上綱上線胡志偉「對女性作出人格侮辱」，又引述教界人士批評胡志偉言行係教壞細路，促佢引咎辭職。
西環高調招呼胡志偉，無非係因為民主黨要林鄭下台，不過政治嘅嘢，無永遠敵人，邊個黨派係政府真正盟友，添馬艦中人，心中有數。