葉鴻輝上月在社交平台爆婚訊，坊間反應熱烈，其未婚妻Christy透露葉鴻輝於場內外完全兩個樣，場內火爆，但場外則甚斯文，首次約會更傾足三小時，可說「估佢唔到」。
兩人約三年前在朋友的聚會初遇，之後唱K認識，輝更主動邀約Christy慶生，首次約會傾足三小時；Christy甜絲絲說：「大家傾偈，但主要聽佢講，佢好多口水。」兩口子開始交往不久就雙雙現身大球場觀戰，只要時間許可，Christy更會現場觀看輝的所有比賽，另外有時間亦會下廚，當然也會一起帶愛犬高菲到屋苑附近散步。
問到輝何時有意向Christy求婚，他表示彼此感情穩定，也認定彼此，覺得是時候便準備求婚：「之前有諗過大概29、30歲結婚，既然有拍拖咪計劃吓，不過要先諗點求婚。」輝原希望求婚過程有驚喜，但晚上突要求量度Christy手指，加上女方沒帶戒指的習慣，故已察覺輝有行動。
Christy說：「姨甥仔生日，其實之前慶祝咗喇，但佢要搞多次，點解咁鍾意食蛋糕呢？當日又要我同朋友拎蛋糕，點知出門口後發覺唔見咗電話，結果我冇去到拎蛋糕，留喺屋苑搵電話，好在有人執到放喺管理處，搵番電話冇耐就有人求婚，夾雜兩種感覺就應承咗。」
她形容輝在場內外是兩個性格：「場內佢好火爆，成日鬧人，但場外都幾斯文，好有禮貌，做嘢好正經，有時好搞笑，好難捉摸。」對於外界表示葉鴻輝筍盤已封，輝笑言一點也不筍，跟他步入人生另一階段是捱世界：「之前已訂好下年尾喺酒店搞婚禮，下季完咗後會去外地影結婚相，家陣要儲多啲錢，其他細節慢慢再搞啦。我哋都鍾意細路，婚後會計劃生B，覺得屋企要有小朋友先圓滿，但冇話幾時嘅，有時唔生性咁點算呀。」