民主同建制派因為打送中條例各自報警，原本各自咁玩對家唔出奇，但作為知名嘅建制派執業律師、假假哋都叫做專業人士嘅何君堯，竟然犯上唔少高登、連登網民錯誤，自貼報案紙變自爆，公開埋自己手提電話號碼，仲俾林卓廷喺fb轉載為佢廣泛宣傳㖭！何君堯話阿廷煽動人打電話騷擾佢，點知噚日俾慢必陳志全一嘢KO，叫佢要怪就怪自己。
反咬林卓廷轉載惡搞
話說何君堯噚日喺立法會送中例搞大龍鳳期間，喺立會會議室玩直播，直播佢同民主派對質情況，話自己收到騷擾電話，明顯對收到「食屎」電話心有不甘，呢個時候慢必反駁佢，口供紙同電話係佢自己公開，但佢點解識遮年齡，又唔遮電話？言下之意係何君堯緊張自己年齡，多過電話號碼！
何君堯俾慢必咁反擊，似乎唔知點駁好，又話大家知佢57歲，手提電話係佢公開，死撐其實任何人搵佢都冇咩所謂，但就係咁話阿廷惡搞佢，搞到佢前日每分鐘收到兩個電話，到噚日收到萬幾個call，佢仲全部記低晒，唔通何律師想逐個打返畀人，問人做乜鬧佢「食屎」？
李八方