最後一戰俾曼城大炒嘅白禮頓，禮拜一終於決定炒領隊曉頓（圖）魷魚，即時生效。曉頓由2014年開始帶領當時仲喺英冠嘅白禮頓，16/17球季帶領球隊拎到英冠亞軍得到升班資格，仲係球會史上首次挑戰英超。不過，今季白禮頓成績認真麻麻，季尾有段時間各項賽事連續七場冇波入，仲要去到尾二輪先成功上岸，驚險保住英超席位，所以曉頓難免都要落鑊。