毛姨遇上石禮謙︰How's your heart?
民主派上周六同建制派就送中惡法大戰，被建制推舉主持會議嘅經民聯石禮謙自然係眾矢之的，民主黨胡志偉仲淚流滿面勸呢個皇仁「師兄」，唔好做千古罪人，今日兩大陣營再開戰，民主派會議召集人毛孟靜同石禮謙嚟個先禮後兵，未打先問候，毛姨姨仲關心石禮謙心臟健康情況。
毛孟靜噚日喺facebook上載佢同石禮謙嘅合照，話石多謝毛當日保護佢，又話佢最擔心胡志偉嘅安全，而毛姨姨知石禮謙曾做過多次心臟通波仔手術，問佢「How's your heart?」石禮謙即時拍拍心口哈哈大笑講：「Very well（很好）！」
毛姨姨又話佢兩人有傾過今日開會嘅事宜，佢曾懇請對方取消建制派今早嘅不合憲會議，但石答咗佢一大車說話，至於呢車說話內容係乜？毛姨堅持屬私人對答，不可覆述。
搓胸勤屈動粗 阿廷︰保安多謝我幫手
呢邊毛孟靜同石禮謙仲叫有偈傾，但作為北京親兵嘅民建聯，就繼續全力老屈民主派，民建聯副主席陳克勤喺個人facebook上載短片，再留言話：「泛民特色勸交：各位有冇見過有人一邊扮和事老，但一邊出手推走保安員？仲一步一步向前行？睇吓呢位前調查員，你就知泛民的卑劣，今日見識這種奇觀，拍片共享。」片中所見，唯一做過前廉署調查員嘅，就只有民主黨議員林卓廷。
無啦啦俾陳克勤擺上枱老屈嘅阿廷，噚日就向八方澄清，指當日出手攬到胡志偉同班保安，純粹因為胡志偉當時身後，即一班保安身前有一級樓梯，佢怕佢哋喺推撞之間叉錯腳整傷，「佢（陳克勤）話我可以推幾個人向後退，我識內功咩？」仲話當日保安其實都有多謝佢幫手睇住情緒激動嘅胡志偉，難怪佢睇到陳克勤段片後咁嬲，「你民建聯係無恥，不過你唔好當巿民隻眼盲先得㗎！你（陳克勤）癲成咁？」