今年係廉署成立45周年，除咗早前推出電視劇集《廉政行動》外，廉署將於5月22至24日舉行第七屆國際反貪會議，今次係廉署首次同國際知名嘅研究及評級機構「世界正義工程」（World Justice Project）合辦會議，其著名嘅「法治指數」（Rule of Law Index）中，其中一項重要衡量指標就係各國嘅反貪工作。
八方聽聞，由於今次會議係同世界正義工程合辦，參與嘅團體同講者會比以往更多元化，當中唔少講者係國際評級機構派出嘅代表，包括經濟合作與發展組織（OECD）、世界銀行、透明國際和TRACE等，仲首次有記者擔任講者，呢位記者係來自塞爾維亞調查報道中心主編Milica Saric（圖），將於5月23日演講，佢調查過涉及清洗黑錢、拙劣私有化、能源問題、私人保安、資助政黨和司法機構嘅事件。佢曾經揭露過塞爾維亞執政黨接受秘密資助，因而獲提名競逐2016年度塞爾維亞全國調查報道獎；2017年因揭露當地興建火力發電廠工程所產生嘅問題，以及對附近居民構成嘅影響，令佢獲歐盟頒發塞爾維亞最佳年輕調查記者獎。