巴黎聖日耳門（PSG）一早已經贏咗法甲冠軍，不過王牌前鋒尼馬，上星期六喺臨停賽前嘅最後一場聯賽，交出1個入球1次助攻，領軍作客險勝昂熱2:1，近4場第1次贏波，但係佢經歷上個月法足盃輸波後郁手打球迷單嘢後，教練杜曹講明，尼馬完全冇做PSG隊長嘅氣質，亦都唔會畀機會佢取代堤亞高施華同馬昆奴斯哥利亞。
PSG踢尾三輪嘅聯賽，尼馬本來應該要開始服刑停賽三場，不過PSG就上訴，所以尼馬暫時仲踢得，如果失敗嘅話，尼馬除咗要缺席最後嘅兩場聯賽之外，下季初法超盃都冇份踢。呢位27歲巴西國腳，今場標奇立異仿效NBA球星近期潮興嘅造型，綁條長頭巾上陣，夠晒搶眼。
2:1贏昂熱止跌
賽前各項賽事近7場只係贏1場嘅PSG，雖然有控球但就冇乜有威脅嘅攻門，16分鐘仲幾乎俾主隊前鋒史提芬尼巴賀根抽爆，好彩41歲嘅保方救得精采。PSG四分鐘後就開紀錄，丹尼爾右路傳中，尼馬喺禁區內側身頭槌破門，拎到今季第15個聯賽入球；之後佢喺58分鐘交出助攻，左路近底線位置傳中，造就迪馬利亞頂入。完場前五分鐘，PSG有馬昆奴斯哥利亞犯天條俾球證趕出場，昂熱前鋒法維安泰特12碼得手破蛋，不過PSG都贏到波。
彈尼馬冇隊長特質
尼馬雖然喺法甲屈晒機，但隊波今季成績認真麻麻，歐聯16強輸畀曼聯，法聯盃同法足盃都輸埋，只係得法甲一個冠軍，近日仲有傳話PSG會換隊長再穩固吓尼馬個心，不過教練杜曹就好決絕咁話冇可能：「唔會，我哋有兩個非常出色嘅隊長，堤亞高施華同埋馬昆奴斯哥利亞，我哋唔會改變呢個安排。對我嚟講，尼馬冇做隊長嘅特質，我唔明點解大家會忽然熱切討論呢個話題。尼馬嘅創造力、技術都係球隊嘅頂級人選，但就冇必要做隊長。」
嘩！杜曹教完第一季呢支法甲豪門，成績唔多掂就要批評埋尼馬，如果尼馬好似自己唔多滿意前教頭艾馬利咁，仲繼續跳草裙舞話想轉會去皇家馬德里嘅話，呢位前多蒙特教頭都應該幾閉翳！