林峯前晚在澳門威尼斯人金光綜藝館舉行「Heart Attack巡迴演唱會」 澳門站，四面台觀眾座無虛席。林峯甫開場即接連唱出《Heart Attack》、《Broken》和《愛不疚》等首本名曲，一輪勁歌熱舞後林峯向觀眾說：「闊別呢個舞台兩年，希望今次只係熱身，明年有更多演出。」台下有觀眾大叫除衫，林峯即說：「大佬，呢個係演唱會，叫除衫係咪入錯咗場？」
吊臂出場前有問題
早前林峯在內地巡演時，已用上一個太空吊臂，讓他可以凌空360度在觀眾席上方，跟歌迷近距離接觸。今次林峯於澳門開騷，吊臂繼續大派用場，雖然他已經事先提醒大家：「握手，唔好拉我，唔好拉腳，否則唔握㗎啦。」結果在握手途中，依然不斷聽到林峯叫歌迷：「唔好拉，停，安全第一。」更一度疑似發生少碰撞，吊在半空的他不停向觀眾席問：「有冇事？有冇事？」得知歌迷沒事才繼續握手，險象環生。
林峯完騷後接受訪問，他表示：「出場前發現吊臂平衡軸有少少問題，一度以為用唔到，我話呢個吊臂好重要一定要有，好彩喺技術人員搶修後，成功用得番。」問到過程中不斷問歌迷「有冇事？」是否曾發生意外？他說：「咁又冇，不過我見到大家好熱情、好逼，我驚佢哋會撞親，其實佢哋全部都好聽話，我叫佢哋唔好拉都好自律。」
儲新歌準備新巡迴
提到有觀眾不斷叫他「除衫」，林峯直言好膩：「始終係一個演唱會，唔係演肉會，我覺得作為其中一個gimmick係可以，但唔應該係重點。」他又透露正構思明年製作全新的巡迴演出，希望多儲新歌，問到女友張馨月可有捧場？他說：「唯一可以講嘅，就係佢睇我排舞已經睇到好熟。」
採訪、攝影：曾小嘉