列斯聯上周六喺英冠升班附加賽準決賽首回合，憑前鋒基馬胡菲喺下半場一箭定江山，作客1:0小勝打比郡。今季聯賽喺主、客場都曾經射破打比郡大門嘅基馬胡菲，喺55分鐘接應積夏里遜傳中，門前射破主隊門將基利奧斯十指關。呢個「士哥」亦係基馬胡菲今季第15個入球。去到77分鐘，列斯右閘積夏里遜疑似侵犯主隊嘅積頓保利，打比郡獲得12碼，但球證保臣同旁證傾過後改變初衷，反而判咗個罰球畀列斯聯。列斯聯最終作客贏1:0，次回合周三返主場再鬥打比郡。
英冠升班附加賽決賽會喺5月27日溫布萊舉行，列斯聯同打比郡嘅勝方，會對阿士東維拉或西布朗。維拉喺上周六首回合賽事，主場憑侯利漢尼及譚美阿巴謙入波，以2:1贏波，次回合周二上演。英冠升班附加賽決賽贏波一隊，會連同諾域治同錫菲聯喺下季升上英超。