星期六立法會《逃犯條例》修例法案委員會大混戰，成班建制派上晒身做戲，其中民建聯陳恒鑌聲稱「為國捐軀」，報稱被新同盟范國威壓倒受傷，但佢連包紮隻手都好求其、仲極速除繃帶，俾網民恥笑佢唔夠專業，佢嘅戲明顯唔及新民黨容海恩，一幕揸住文件怒目瞪住遭㩒低嘅胡志偉，俾網民瘋傳同改圖，將佢同當年文革揪鬥相放埋一齊，出奇神似，個個話容海恩紅衞兵上身。
網民︰同一手法對付袁彌昌
噚日容海恩嘅怒目圖可謂鋪天蓋地，藝人邵仲衡就喺fb貼咗六七暴動時，一班左派嘅抗議相，拍埋容海恩張相，再加句「狼虎年華1967~2019」；亦有網民將容海恩張相，同文革時紅衞兵㩒低人批鬥嘅場面拼埋，兩張相不論姿勢神情都好相似，有網民話容「現真身」變紅衞兵、革命女幹部揪鬥民主派，又有人話唔知佢老公袁彌昌早排喺fb撐13萬人上街反送中，容海恩係咪用相同手法對付佢？
至於俾網民恥笑佢啲戲唔夠專業嘅陳恒鑌，先被發現包紮方式好有問題，冇繞過後頸，只包住手肘，質疑佢實情整親邊度？之後fb專頁「急症狂人Dr Kwong」就話陳恒鑌包紮係反面教材，逐一點出陳嘅錯誤。有網民揶揄陳呢個「掛法」係「唔X係掛」，仲有人留意到點解傷咗仲戴手表？同埋點解膊頭傷咗，竟然綁手？ 但陳恒鑌最唔專業係，佢呢頭話受傷，轉頭俾啱啱去完瑪麗探范國威嘅新同盟區議員譚凱邦影到佢極速除繃帶，完全冇事咁。其實建制派可唔可以專業啲，做戲都交足貨呢？