在馬場碰到一位成功商人，傾馬之餘，佢突然問：「點解田北辰咁大膽，向政府提出撤回修訂逃犯條例草案？」立法會議員噃，對法例之事，如果有意見，向政府提出建議，係天公地道之事啫，何來大膽？不過商人又加多一句：「田二少係建制派，人大代表吖嘛，一定係愛國人士，愛國人士點會唔聽特區政府話嘅啫？田二少要求收回，仲唔係夠膽？還是背後有人撐腰呀？」講到咁，則非吾所知也，田二少搞G2000，與製衣界及地產界有縱橫交錯嘅商界及私人關係，佢是否代表埋部份商界人士聲音，有待觀察，不過至少表面理由成立。
立法會商界議員其實如果投票贊成修訂逃犯條例，幾乎係肯定違反商界選民之利益與意願。香港功能組別選舉係一個畸形制度，但即管如此，功能組別選出之立法會議員何以夠膽唔聽選民意願，反而緊跟政府，是否背後有西環發功，要佢地緊記「聽黨話、跟黨走」呀？倘若真的如此，無法啦，習近平發表愛國定義之後，愛國也者，就是不准有自由之精神及獨立之思想，只能行屍走肉般做投票機器。
田二少奇兵突出，似乎不是愛國人士。自由黨黨魁鍾國斌（紡織界）則目前為止，仍然企硬，不肯支持政府修訂逃犯條例，也不是愛國人士，鍾國斌深切了解商界在內地經營之實際困難與「講關係」之成本，非常貼地，是故不贊成。可惜吖，其他商界議員仲係唔敢為自己選民請命，仍然左望望右望望，幾徬徨。建制派最資深議員石禮謙係絕頂聰明、挑通眼眉之人，非「聽黨話跟黨走」之愛國議員梁美芬可比，應該去了解吓平時好鍾意對記者講嘢，把口叻過幾十萬人嘅陳啟宗，何以一見到記者就閃，費事回答有關逃犯條例問題？陳啟宗本來係忠心建制派，經常為政府政策護航，但呢次大概啃唔落，又唔想得失林鄭，故此閉口不言。石禮謙議員代表地產建設界，呢行在大陸搵大錢，搵錢背後有不少故事，石議員一定明白嘅，佢有乜理由贊成修訂逃犯條例呀？如果單講法律，立法會法律顧問有自由思想，獨立之精神，向政府提出質疑要求解釋疑團，值得市民喝采，商界議員豈可不睇清睇楚？佢地嘅知識與水平非工聯會與民建聯議員可比，唔應該盲目跟住李家超行喎！