民主派同建制派聽日喺立法會修訂《逃犯條例》法案委員會大戰在即，有人噚日發現喺法案委員會主席「阿涂」涂謹申嘅立法會議辦水牌上貼滿打氣便條，當中除咗叫「涂主席加油」，亦有人留言寫上：「啲人成日話香港靠晒後生仔，計我話都係涂主席你最可靠，星期六加油！」同埋「薑越老越辣，今鋪睇你頭，加油啊！涂主席必勝！」
阿涂接受八方查詢就話，噚日朝早喺議辦發現便條後好鼓舞，話過去好少收到咁色彩繽紛同窩心嘅嘢，透露近日出街時多咗巿民同佢講「辛苦你」同「加油」，老婆亦傳來好耐無傳過嘅加油WhatsApp短訊，令佢好開心。佢噚日將便條收好放喺辦事處近門口位置，令自己一入門口就睇到。
壓力大到唔開胃
阿涂不諱言最近感到相當辛苦，除咗因心情緊張同壓力搞到去廁所唔太暢順，連食飯都唔太開胃，坦言巿民鼓勵同支持相當重要，近日亦會聽吓日劇嘅背景音樂減壓。對於留言話「薑越老越辣」，阿涂笑言唔會認自己好老，「起碼我嘅心情上唔覺得自己老㗎」，加上成日同囝囝玩，所以心境都好後生㗎！對於關心同支持佢嘅巿民有乜嘢講？阿涂話如果同佢一樣都係信基督教嘅巿民，可以向上帝為佢禱告；無信仰嘅大家都可以默默祝福佢。
李八方