特首林鄭月娥噚日話針對《逃犯條例》修訂嘅「極端言論」都係「廢話」。林鄭競選特首時嘅對手、前財政司長曾俊華（圖）話近期忙住搬屋無留意件事，但就話修復社會撕裂需要包容同埋諒解，亦都要「接受其他人講嘅嘢」，唔知薯片叔叔呢番說話係咪講畀娥特聽呢？
薯片叔叔噚日出席港台頒獎禮後同八方講，自己參與得獎節目《修復時刻》，留意到社會有好多撕裂，要有修復嘅過程，拍攝期間感受很大，尤其係其中一集有關城市設計，了解到「好多嘢係之前遺留落嚟，我哋要珍惜」，近年社會撕裂嚴重，薯片叔叔話最緊要係大家多啲包容諒解，大家走多一步，相信係大家都可以做到嘅事。
籲多啲包容諒解
八方就問多句，如果話其他人意見係「廢話」會唔會加劇撕裂呢？薯片叔叔就重申要包容，「大家要接受其他人講嘅嘢，同埋大家要了解自己立場、有咩自己可以做，令情況可以向前面行一步」。如果娥特肯聽人講，好似薯片叔叔咁講喺送中例修改問題吸納不同意見、守護回歸留到𠵱家嘅核心價值，香港唔會搞成咁。