潮流興創業，特別係科技創業，全世界國家/地區都夢想重現美國矽谷經驗，培養大批新經濟企業，帶動GDP增長及追貼21世紀科技發展。香港講創業，比比皆是，七十年來已有傳統，李嘉誠就係香港最偉大創業家，在五十年代從無到有，由塑膠花發展至地產、酒店、碼頭、零售、電訊及新科技，成就空前，李兆基、郭得勝、霍英東等等都係由戰後初創企業開始，一路不斷成長嘅。時至今日，創業多數講hi-tech，以前左丁山於創投公司服務時期（1980年代），大家講慣hi-tech揩嘢，low-tech撈嘢，左丁山所屬公司投資hi-tech揩咗幾次之後，改變投資策略，專門投資於快餐、珠寶、酒店等「收入需求彈線高於一」嘅行業，大獲全勝，由Big Four核算七年投資期嘅IRR係41%，傲視香港同行。點知因為太成功，後來股東不和分裂，各奔前程，這是另一個故事了。
時至今日，係人都知投資科技可獲巨利，李嘉誠基金會一早洞悉先機，二十年來投資於高科技，當然有贏有輸，但近期之成功投資（Spotify，Zoom）皆令人佩服佢地嘅投資眼光。
中文大學一批校友幾年前就覺得有需要推動中大校友之投資研創氣氛，唔好話有史丹福咁叻，學到一半都會對香港有莫大貢獻，於是三年前由校友捐款支持成立的「中大校友承傳基金」與校友事務處合作，辦咗第一屆中大創業日（CUHK Entrepreneur Day），得到校友熱烈反應，去年第二屆，更加哄動，眨吓眼今年又搞第三屆「中大創業日」，由五月十日至十一日每日朝十晚六假中大李兆基樓舉行，由校長段崇智教授，校友陳茂波司長，校友梁國浩（貿發局助理總裁）主持開幕禮，司儀係方健儀校友。內容除校友之創業項目展覽/介紹之外，還有創業比賽，由六位校友做評判，包括任景信（數碼港管理有限公司行政總裁），莫偉軒（香港科技園公司科技創業培育計劃總監），勞維信（點亮資本合夥人），劉小鷹（老鷹基金創始合夥人），文立（海闊天空創投聯合創辦人）及江振鴻（香港X科技基金投資總監）皆是中港科創投資界有名人物，可說陣容鼎盛，今年有近80個多元創業展覽項目；涵蓋AI，大數據，金融科技，醫療保健，電子商務，程式開發，裝置以及文化藝術社會創新領域，其中一個Homecourt（籃球App）（已有NBA球星Steve Nash投資）更是吸睛項目，歡迎各界對創業項目有興趣人士到場參觀或與創業者討論。