港超聯球隊夢想FC今季喺梁志榮帶領下，都入咗兩個盃賽決賽，口碑唔錯。星期五佢哋就喺足總盃四強硬撼傑志，不過賽前竟然傳出佢哋欠薪消息喎！
雖則話就話「夢想」，但始終都要食飯，有汗出冇糧出，好陰功㗎！我求大俠噚日朝就過石硤尾探佢哋，睇吓到底係乜嘢一回事！當全隊已經喺球場度熱緊身，柏保路、拿祖同埋川瀨浩太等八位外援就連鞋都未換，喺場邊同助教冼家裕密斟。不過，大概傾咗半粒鐘，大家都着番對波砵投入訓練。我求大俠覺得，操練氣氛都算唔錯，似乎冇咩特別。臨收操前成班球員仲練射12碼，準備星期五隨時要踢到互射12碼。
「遲出糧常出現」
噚日梁志榮屋企有啲事，所以課操練係交畀招重文等幾位助教主理，細榮sir要等到操練中後段先去到球場。收操之後，細榮sir同全隊講完嘢，都特別再同幾位外援傾多陣。我求大俠就問細榮sir了解吓咩情況啦，佢就話：「財政唔係我負責，都唔方便講太多，我都係負責番球場入面嘅事。其實我哋一向都會遲少少出糧嘅，但今個月再遲多啲，大概10日左右。可能係季尾關係，外援會比較擔心，驚佢走嗰陣收唔到份糧。」
周五足總盃四強撼傑志
其實夢想啱啱先喺聯賽大勝理文6:0，士氣好好，準備星期五喺足總盃四強挑戰傑志，睇吓可唔可以殺入決賽，甚至攞埋亞協盃參賽資格，點知就爆出單咁嘅嘢，怕唔怕打擊士氣呀？細榮sir就好樂觀，佢話：「球員都需要爭取續約，或者繼續留喺香港落班，都要畀到表現人哋睇嘅，唔會有太大影響。」