立法會噚日審議財政預算案,本身因為《逃犯條例》修訂而打緊仗嘅立法會,大半日已經響鐘超過五次,政府當然照常出動由AO、EO組成嘅「狗仔隊」,全日留守會議廳外,確保有足夠議員開會,唔好搞到流會,唔知係咪建制派議員噚日太乖,冇人失場,定係狗仔隊人數太多所以太清閒,其中一名成員竟公然喺執行緊「通傳應變職務」期間睇波,仲要係利物浦大奇蹟日反勝巴塞殺入歐聯決賽嘅大戰。
嗰位狗仔隊成員佩戴「公職人員」證件,守候會議廳大門對外綠地毯位置,同其他狗仔隊一樣手上都拎住通訊器材,但佢唔係記錄議員出入,而係用iPad睇波,現場所見佢至少睇咗15分鐘,甚至喺會議廳內未有足夠法定人數而打緊鐘嘅時候都繼續低頭,專心望住螢幕另一塊「綠地毯」,其實呢名「狗仔」似乎知自己咁公然睇波俾人眼望望,所以不時轉姿勢角度,以為咁樣可以令旁邊嘅人睇唔到,但波就點都要照睇。八方見佢睇波冇乜表情,好難估呢名「狗仔」係利記定巴塞擁躉,不過返工睇波點都唔啱,如果一旦立法會流會,呢位「公職人員」該當何罪?算唔算「公職人員行為失當」呢?