曼聯今季成績唔達標，獎盃四大皆空之餘，更連英超前四都冇埋，下季只能再次轉戰歐霸盃。有魔粉對球會嘅表現極度唔滿意，發起網絡杯葛，呼籲大家一齊取消對球會官方twitter嘅關注（圖）。
曼聯球迷將傷心化為憤怒，#UnfollowManUnited嘅網上呼籲已經啟動，除咗宣洩不滿外，更重要係反擊行政副總裁活華特經常滿足於紅魔係全世界最歡迎球會嘅態度，希望佢唔好再利用球迷嘅忠誠，作為自己嘅宣傳手段。之不過，呢次社交網絡抵制，實際只係起咗少少作用，事關曼聯官方twitter喺過去兩日，只係少咗一萬人多啲，家陣仲有1,921萬人關注，但發起人就有自信嚟緊會有更多人unfollow，講到明呢個係長期抗戰。