【黑鏡線索】
近期一連串startups排住隊上市，其中一間，係Slack。Slack係個畀企業用嘅messaging app，係史上增長最快嘅科技公司之一。佢申請上市交嗰盤數，靚到冇乜好挑剔。
Slack嘅創辦人係一個傳奇。對上一次創業，原本做網上多人遊戲，個遊戲唔係好成功，但係佢發現其中分享相片嘅功能好受歡迎，於是把心一橫拆出嚟，變成Flickr，係當年web 2.0嘅領頭公司，不過好早就賣咗畀Yahoo。第二次創業，又去整遊戲，又俾佢中途發現，應該將自己整畀內部用嘅messaging app拆出嚟，結果變成Slack。
溝通不重質 難解決問題
Slack嘅口號，大約係幫你嘅團隊更容易溝通，因此做出更好成績。我哋公司都用過一輪，不過最後發現得不償失，冇再用。Slack係少數做佢股東好過做佢用戶嘅公司。
溝通，籠統嚟講，一般覺得梗係多啲好，大家多溝通，就會促進合作，減少誤會，唔啱講到啱，唔明講到明。溝通越即時，團隊反應就越快，可以更緊貼市場，等等等等。
但係，一，最欠嘅，係唔係溝通嘅量？當然，如果間公司好極端大家唔溝通，咁多啲溝通可能有着數，但我估，好多公司，欠嘅唔係溝通嘅量。以我哋以前為例，後來發現，要團隊向同一方向進發，最欠缺，係一啲基本框架。公司產品針對嘅，係邊類用戶？產品定位，係高中定低檔？點搵錢？收費模式？燒錢谷增長定係有盈利目標？以上問題嘅答案，加唔加得埋？如果大事未溝通好，喺小事上懶多溝通，都只不過係自我感覺良好，冚住個問題，冇解決。
二，Slack等工具，減少咗發言嘅friction，但係friction本身有佢嘅用處，就係令大家發言之前，稍為諗一諗，個留言係咪有價值？溝通最大嘅成本，係時間，稍為有開過會嘅，都會明白。留言多咗，睇嘅人用嘅總時間就多咗。想像吓，一個一百人嘅WhatsApp group，每一次有留言，就有一百個人要花時間睇。睇係好快，但最大嘅時間成本，係本來做緊一樣嘢，分一分心睇個留言，返轉頭，隨時要用幾分鐘或更多，去進入返被打斷前嘅節奏，條數好襟計。你開會慘極，都有散會行出房嘅一刻，留言，可以死唔斷氣，間唔中又彈出嚟搞吓你。
訊息零價值 影響生產力
今時今日，大部份人感覺到，每日俾social networks逼到有啲社交疲勞唞唔到氣，有人開始用方法節食facebook、Instagram，但公司嘅工具，你夠唔夠膽節食？你WhatsApp可以靜雞雞mute咗親朋戚友啲group，公司Slack group呢，你未必夠膽熄，尤其係當其他同事好似好投入咁留言。
當大家用溝通工具，用到疲於奔命，生產力會唔會好？講到尾，最終唔單係工具問題，而係關於公司文化，到底係鼓勵乜嘢行為。Slack太容易亂用，我哋最後揀用Basecamp，鍾意佢個設計有助大家合理地溝通。無無謂謂咁事事real time，唔係齊心，而係虐待。
撰文：宋漢生