本周六修訂《逃犯條例》法案委員會會議大戰前夕，由民主派選出嘅法案委員會主席涂謹申，同獲建制派推舉取代阿涂主持會議嘅石禮謙，以及被建制派一早欽點做委員會主席嘅謝偉俊，噚日中午喺立法會「冤家路窄」，而且仲搭埋一架𨋢！連民主派會議召集人毛孟靜見到，都即時記者癮發作，拎起手機影低呢幅世紀合照，之後再上前向三人「集郵」。
花生友毛孟靜發記者癮
其實呢幅世紀合照之所以有機會出現，完全係謝偉俊同石禮謙兩人促成。話說阿涂噚日會見傳媒後，就搭𨋢返立法會辦公室，石禮謙同謝偉俊見狀，即時叫阿涂唔好閂門等埋佢哋，其間謝偉俊講笑話：「三位主席喎！哈哈哈哈！」石禮謙即時搭嘴話：「我只係呢個集團嘅……哈哈哈哈！」但就冇講係呢個集團嘅乜。作為花生友嘅毛孟靜見到呢個場面，立即叫三人唔好閂𨋢門住，等佢舉機同三人影咗呢張世紀合照先，之後再上前同三人合照，似乎覺得呢個短暫停戰一刻好值得記錄喎！