立法會秘書長陳維安俾民主派搵咗成日，噚日終於唔再龜縮，肯現身見記者，仲出席立法會《立法會議員酬金及工作開支償還款額小組委員會會議》，不過民主派議員冇放過佢，繼續搵位寸佢薪酬同工作表現係咪相符，但最搞笑係，個個月袋緊納稅人26萬公帑嘅陳維安，竟然話唔知自己一個月收緊幾多錢人工！
話說陳維安開會前先見記者，之後再畀慢必陳志全當面狙擊，佢面對記者同慢必時一臉嚴肅黑埋口面，不過一去到會議廳開會就即時「變臉」，神情經鬆面露笑容，同秘書處職員打招呼。
不過就算開會都唔代表避得過民主派狙擊，民主派議員前日話明陳維安偏幫建制、龜縮唔見議員，已經有失職之嫌，公民黨議員譚文豪就喺會入面問陳維安，究竟佢一個月收緊幾錢人工？即使幾hea做份工，都冇理由唔知自己人工係幾多，點知陳維安答佢屬政府D6職級薪酬，「（月薪）呢個係公開資料，但好唔好意思，我手頭上冇確實（數字）」。
被寸人工高過老細
嘩！連自己一個月收幾多人工都唔知？難怪譚文豪即時寸佢：「多得滯，唔係好數得到？」之後譚文豪提陳維安，佢現在每個月收緊納稅人26萬人工，雖然佢受僱於全體立法會議員，但人工就係議員近三倍，議員嘅月薪連政府D1職級亦不到，譚文豪寸陳維安：「唔怪得可以越權，可以當自己係主席，甚至當自己係議員，我終於明白點解嘞，原來佢人工咁高！」
李八方