《逃犯條例》修訂搞到民主派同建制派開大片，其實即使係建制陣營，亦唔係個個肯無條件幫娥特硬啃呢條惡法，好似實政圓桌立法會議員田北辰早排去信娥特，建議撤回草案，先改例用港人港審方式解決台灣殺人案，娥特梗係唔理，不過田二少前黨友、行會成員葉劉淑儀竟然走去二少fb踩場，插二少建議唔可行，仲話二少「誤導群眾」，點知俾二少一個回應KO。
田：有讀過書又識字可參考
話說二少喺fb貼咗佢畀娥特封信，咁就梗係有人支持、有人反對，但估唔到葉劉都去踩場，話二少提嘅港人港審係空洞口號、完全唔work，話冇一個司法管轄區會輕易放棄自己嘅司法管轄權，仲話二少「你是個讀遇（過）書的人，不要再胡說八道，誤導群眾了！」
二少好快出文反擊，先講明「有讀過書又識字可參考」，擺明寸葉劉，之後貼咗「中華人民共和國和法蘭西共和國引渡條約」嘅連結，仲特別引用當中第四條寫明，如果被請求引渡嘅人，同時有被請求作引渡一方國家嘅國籍，呢個國家就可以拒絕引渡，被請求引渡嘅國家，仲可以要求提出引渡國家提交證據在當地審，換句話講等同係中國人可以喺中國審、法國人可以喺法國審，唔一定要引渡去對方國家，亦即係中、法兩國其實都一定程度放棄自己一啲司法管轄權，應該有讀過書同時應該識字嘅葉劉，唔知點回應？