審議《逃犯條例》法案委員會當奪權立會秘書處同欽點石禮謙冇到，昨午繼續開會選主席，建制派集體杯葛，但偏偏有一人亂入搶fo，早排生完B嘅新民黨容海恩，單拖舉起寫上「這個不是會議！」嘅牌入會議室叫嚷，仲大聲話「唔承認今日開會」，但自行喺會議廳罰企一陣後就無以為繼自行黯然離場，點知未出門口，竟然同毛姨姨舌劍唇槍「過招」，八方睇番兩人的對話內容，容海恩原來都幾誠實，對自己嘅無知完全唔掩飾。
據毛姨姨自爆，當時自己用英文問最近生完BB嘅容海恩：「How're you going to be answerable to your baby?（你點向你BB交代？）」勢估唔到容海恩竟然秒回一句：「I don't know!」又係嘅，通過「送中條例」葬送香港，確係難同下一代解釋，唔通容海恩想趁機同毛姨姨盡訴心中情？
毛姨姨兩公子三十出頭
容海恩之後就想寸番毛姨姨「You don't even have babies!（你都冇BB！）」如此回應，毛姨姨當然冷不提防被殺個措手不及，只好認真話畀對方聽自己係兩子之母，咁兩個仔，當然都曾經係BB嚟啦！其實毛姨姨兩位公子早已三十出頭，雖然唔多曝光，但毛姨姨過去受訪都有提起佢哋。不過，對於慣咗要人「不如你話我知」嘅容海恩，其實唔知又真係幾正常嘅！
李八方
