石禮謙反對徵收一手樓空置稅，曾經破口大鬧政府「衰過共產黨」。言猶在耳，逃犯條例針對的，除了剔走九條，還有N咁多條招呼商界。石禮謙功能組別的靠山那些大老細，會叫石禮謙盡快郁手幫李慧琼通過條例？倒自己米？政治一日都嫌長，民建聯以西環之矛，攻本地商界之盾，考驗後者那個是不是豆腐渣做的。商界配合衰過共產黨的林鄭政權，會自己整瓜商界自己友？民建聯背後的金主，在追溯期的魔咒下，自忖難逃送中厄運，冇理由繼續開水喉。以後的黨慶籌款，本地商家縮手，西環行埋，唱晒飲歌籌到八位數字善款的畫面，永遠成為過去。商家聽到被拒入境的馬凱說，香港是溫水煮蛙，馬上冷笑一聲，蛙個屁咩，商家大鱷，直情變鱷魚肉，水滾就落鑊，習總中意幾時飲呢煲鱷魚肉老火湯就落柯打叫妹仔速遞過去。蛙與鱷，同墮endgame送終模式，冇復仇機會。
2003年50萬人上街令田北俊當上拉倒23條的功臣，今次個波又落在商界的鱷魚腳下，大腳解圍抑或送個波入自己龍門？石禮謙拜咗車公未？