出外旅遊，多的是賞心樂事，往日本更少碰上煩惱，除了語言不通之外。可惜呢，人老了，如伊利沙伯醫院年輕醫生所言：「香港人不要老，不要病」，年紀已大，即使無病，腿部關節，尤其是膝頭，有幾成機會磨損，落樓梯、下斜波，可說步步維艱。如若不信，不妨試從LRC（婦遊會）外面，沿舊山頂道走路到FCC，或從美國領事館沿花園道行到長江中心。左丁山好彩數十年來在中環幾間平地大廈工作，極少上斜落斜，至今仍可每日行走一萬至二萬步，但不少朋友已難享受步行樂趣。老友記著名骨科專家C便曾對左丁山說：「港島區的斜路多，每年為我帶來新病人！」
美國人好緩步跑，嬰兒潮男女現已進入老年。於是美國的換膝換臀手術極多，此類手術宗數在香港近年不斷上升，如有錢請私家醫生做手術，二十萬元唔知有冇得找，到公立醫院排隊，等三四年起碼啦。
等唔切做手術後先至去旅行，去赤鱲角機場要求坐輪椅上機，咁就麻煩咯！香港機場輪椅奇缺，推輪椅之人全是上年紀的阿叔阿嬸，有時有人無輪椅，有時有輪椅冇人推，令揸枴杖不良於行，或不能行幾百至一千米的老人家（當然亦有傷殘人士）啼笑皆非。上次出門去泰國旅行，兩位親人預先告知地勤人員要輪椅兩張，結果來了兩張輪椅，但只得一位阿叔，呢位阿叔技術純熟，一個人推兩張輪椅，無驚無險到候機室，今次去日本，同樣訂兩張輪椅，結果又係有兩張，只有一位五十幾歲嘅阿嬸，佢話：「冇人嘞，機場請唔到人，你地坐上去啦。」但佢跟住講：「我冇力推兩架㗎。」望住左丁山話：「你幫手推一架，跟住我行就得嘞！」左丁山為之啼笑皆非，唯有馬死落地行，推一架輪椅跟佢尾。去到福岡，一落機，兩位日本男士已有兩架輪椅等住，服務周到，比香港好得太多。
到咗回港之時，福岡機場之港龍地勤非常有禮貌，一男一女親自推輪椅到候機室，令人覺得日本係好好嘅。三小時後，返到香港落機，輪椅呢？對唔住，一架都冇。空中小姐滿懷歉意咁話：「唔該你地等吓啦！」等乜呀，等待果陀乎？左丁山撞火咁話：「如有輪椅就等我推啦！」地勤話：「人又無，輪椅又無，唔該等等！我地日日俾乘客鬧，你可以寫信去國泰港龍投訴！」投訴個鬼咩，左丁山可以代寫埋公關回信啦。後來有位港龍空姐經過，細細聲對左太講：「行得就自己行啦。機場冇乜人推輪椅㗎！」咪行囉，舉步維艱都要行，香港機場輪椅服務確實羞家，愧對外國遊客呀！