今年係六四事件30周年，支聯會一如以往喺西貢清水灣郊野公園大坳門，舉行民主風箏行動，悼念因為民運而死嘅人，同埋表達平反六四訴求，不過噚日天氣認真麻麻，大風大雨，不過正如每年六四遊行同集會，支聯會係風雨不改，所以仍然冒住大風大雨成功放咗民主風箏上天。
民主風箏自1990年開始已舉行，當年紀念八九民運期間，喺天安門廣場嘅學生用放風箏方法，阻擋政府派直升機飛去廣場，支聯會副主席蔡耀昌同八方講，噚日天氣真係唔好，開頭只係大風，之後仲落大雨，但大風都有大風好處，就係兩隻民主風箏好易放上天，佢哋先放咗寫住「人民不會忘記」風箏上天，之後再放埋寫住「平反六四 公義必勝」嘅風箏，原本參加活動嘅支聯會成員，佢哋仲有其他風箏會放，但真係太大風大雨，最後放完支聯會嘅風箏後就結束活動。