慣常幫襯的菜檔小老闆一邊揀蛋一邊問我，點解唱國歌條片，淨係見到過氣皺皮的藝員亮相，「隻狼唔見影，老董冇蒲頭，身家幾百億的大老細去晒邊？係咪已經着草？」係早着先機嘛，大劉司法覆核，用流亡而唔係着草。「逃犯條例搞成咁，佢地粒聲唔出，沉默得不祥。係咪嚇到心臟病呢？」公院逼爆就知，大老細入私院，冇數據透露，近期入院養病的闊佬急增。不過呢，萬一醫委方案開綠燈，強國所謂醫生拎住淘寶名校文憑來港「執業」，民建聯提倡唔使考試喎，這批強國手順利融入行家中，公院戰場並非佢地目標，私院才是安心𢱑銀之地。大老細入私院等於撞彩數，隨時被內地混吉醫師打錯一支針就提早找數。「闊佬唔撐林鄭市長，佢郁新界佬荷蘭丁利益，又拎晒香港人嘅錢擲落明日大嶼，與天鬥，與闊佬鬥，與土豪鬥，好打得真係累人累物！」我問菜檔老闆以後日子要怎樣過，他以典型香港仔識走位口吻回應：「食多些菜少食肉囉，陳健民教授都話一年前已經練習沖凍水涼啦。」民望凍過水的林鄭自以為連任凍蒜在握，試吓冰桶照頭淋啦，葉劉明串佢：醒未呀B B？