禮拜四歐霸盃四強首回合，阿仙奴主場靠拿卡錫迪入兩粒，3:1反勝華倫西亞，同車路士作客由柏度洛迪古斯入波，1:1逼和法蘭克福後，呢兩支倫敦勁旅會師歐霸決賽嘅可能性再次增加，而英超下季亦都越來越大機會有五隊波踢歐聯喇！
艾馬利：華倫會瘋狂反撲
之前英超三連敗，今場以最強陣容出戰嘅兵工廠，11分鐘仲俾華倫嘅角球攻勢搞掂，中堅莫達迪亞卡拜近門頂入。不過18分鐘拿卡錫迪接應奧巴美揚傳送輕鬆射入，過多七分鐘，拿卡錫迪再接應格列沙加左路傳中建功，槍手好快超前。踢到90分鐘，奧巴美揚接應哥拉辛拿斯傳送，窄角度窩利破網，阿仙奴反勝3:1，下星期四會作客華倫踢次回合。拿卡錫迪就叫隊友唔可以再因死球失波︰「我哋因死球失咗太多波，次回合必須小心。我哋想贏歐霸盃直接晉身下季歐聯，同時都想捧盃。」雖然有兩球優勢，但以前帶西維爾贏過三次歐霸冠軍嘅槍手主帥艾馬利認為只係五五波：「次回合非常難踢，我知道華倫下星期會瘋狂反撲。」
車仔收起夏神有柏度救駕
車仔就收起咗夏薩特、希古恩等部份正選，同樣先落後，23分鐘俾法福前鋒盧卡祖域頂彈地波入網，不過完半場前兩分鐘嘅角球攻勢，羅夫度斯卓克喺人堆中助攻柏度，後者幫車仔射入追平1:1，之後車仔控制大局，但有大衛雷斯罰球中楣，61分鐘夏薩特入替埋韋利安，不過最後都冇波入，創出咗歐霸盃連續16場不敗嘅賽會新紀錄之後，下星期四返去史丹福橋踢次回合，只要和0:0或贏波都可以出線。
車仔領隊沙利就話收起夏神係逼不得已︰「佢已經連續踢咗10場，一個球員單季要踢70至75場比賽係冇可能。」今屆歐霸決賽會喺5月29號踢，地點係阿塞拜疆首都巴庫嘅奧林匹克球場，可以坐到接近七萬名球迷。
