現任記者協會主席楊健興等一批資深傳媒人，搞緊個《我是記者－我的六四故事》（I am a Journalist, My June 4 story）攝製項目，準備請30個曾經直接採訪六四事件嘅記者拍攝短片，講返「我的六四故事」。原本呢啲短片拍攝計劃好平常，但八方發現呢個項目嘅facebook專頁宣傳片，懷疑俾人檢舉有「血腥暴力內容」，搞到一度俾facebook「包膠」。
經審視後解封
八方噚日朝早發現，佢哋fb專頁宣傳片突然喺播放前，會出現「這段影片可能含有血腥暴力內容」警告字句，要自己按「取消」先可以睇到條宣傳片，呢個情況就好似成人刊物「被包膠」咁，不過到噚日下午4點段片俾fb「解封」，就再冇出現警告字句，大家可以隨時click入去睇。
有網民估計應該有大批五毛向fb瘋狂檢舉呢條宣傳片有暴力內容，於是fb就跟程序包膠，以往五毛用過相同招數令一啲民主派人士戶口被fb禁言一段時間，甚至有人嘅戶口因為咁被fb關閉。
有關宣傳片製作組發言人就話，佢哋收到fb回覆，話為咗保障用戶使用時嘅安全，fb會喺包含不雅或血腥暴力內容嘅相片同影片顯示警告，等用戶喺檢視前可得知內容相關訊息，令只有年滿18歲嘅用戶先可以睇到。不過經fb就呢條片再次進行審視後，認為條片涉及內容只係記載重大歷史範疇，所以之後決定取消顯示有關警告。
李八方