標榜行中間路線嘅行政會議成員、民主思路湯家驊，最近開始為政府修訂《逃犯條例》發功，佢噚日單刀赴會，同前黨友公民黨郭榮鏗展開激辯。辯論過後，湯家驊接受傳媒訪問，講述佢都明白香港人擔心修例係因為驚被送去中國受審，點知講講吓，佢居然相當坦率咁話大陸「一黨專政」。乜佢唔驚修例之後被人翻舊賬咩？
當時嘅情況係咁嘅，被問到13萬人上街反惡法時，湯家驊話咁樣反映政府可再做好啲解釋嘅工作，佢亦理解香港人擔心被移交到內地，但其實內地已經有改進，例如將啲判決放上網，增加法院透明度，然後佢就話，「當然喺一黨專政下，要中國嘅司法制度改到好似其他唔係行社會主義嘅國家嘅制度一樣，我覺得係相當困難。」
須知道中聯辦主任王志民講過「一黨專政」係偽命題，就算舊年中共修憲又話中共領導係中國特色社會主義最本質嘅特徵，但憲法亦話大陸係由中共領導嘅多黨合作，湯大狀咁公開講中共係「一黨專政」，隨時得罪北京。