13萬市民遊行撼動不了刻不容緩邀功的林鄭市長，好心急的局長指揮無惡不作的建制陣營，打算硬推講過「呢屆政府仲衰過共產黨」的石禮謙擠走涂謹申，建制議員去到咁盡，臨加時，出茅招，鏟腳鬆踭插眼做齊，球證靜雞雞冇吹罰還俾like叫個茅躉鏟狠些，場波，建制玩晒啦！人在做，天在看的立法會，要修訂一下，這些做俾上帝感召睇的，唔係人！
特區捱唔到22年就要「被一國一制」，林鄭拉香港後腿，沾沾自喜做了市長，煲呔曾力銷的亞洲國際都會，迅速從689和前下屬林鄭手中淪落，試問全世界邊有官員日日唱衰自己是「逃犯天堂」！而逃犯天堂遍地億萬富豪，宇宙最長工時馬雲同志和騰訊馬老闆都是逃犯天堂的大業主，還有西環這個掃筍盤機器哩！香港唔係雷教授推介叫雞都可以用支付寶的深圳，逃犯天堂，香港獨家，就是李瑞環說的那隻紫砂壺。送中咒一砸，茶涼走人，由誠哥到大劉，中產到小資，朝搵老襯的大灣區反方向逃離，留低爛尾的明日大嶼！當年李瑞環同志訓示不能刷掉紫砂壺裏的茶漬，林鄭市長當時做緊平庸的公職，今日意圖摔破茶煲，以證明自己是港英餘孽死剩種聯盟中，最好打那個嗎？車公冇撞飛林鄭葉劉兩位喎，見鬼，兩位婦人，真係壞咗！