復活節長假期，大量港人出外旅遊，最爆滿嘅交通工具就係高鐵，與東瀛遊執董禤國全講起，佢話高鐵帶動起一陣潮汕遊熱潮，佢哋試過在假期一日辦四五個團去潮汕，直情可以包起三四個車卡，叫做可以幫補一下被網站搶去嘅酒店加機票代辦生意。酒店網站一日賣幾十次電視廣告，搞到沙田陳太個K3孫女都識讀個網站名字，可見已深入民間。禤老闆話競爭激烈，唯有除咗一啲「牛油麵包」嘅基本生意外，要諗多啲增值計劃，一於雙翼齊飛，保持營業收入。不久前禤老闆親自帶超級豪華美食團去西班牙、法國，食足接近21粒米芝蓮星（一星至三星嘅餐廳），兼往來商務客位，住宿超級豪華酒店，更以此特別賣點，每位收費18萬，一團就帶來收入近六百萬元，可見香港人消費力之強。
左丁山就冇咁豪咯，本來唔想放假同人鬥擠逼，點知肥仔K話有女性朋友嫁往福岡，應邀過去行一行，於是假期去鹿兒島一遊。唉，既要就住孫兒孫女返學日期，又要受機位、酒店房間限制，將旅遊時間表改來改去，竟然擠出咗跑馬時間，令左丁山趕唔切在四月二十八日到馬場睇「美麗傳承」破紀錄，都幾遺憾。後來先知道，香港客絕大部份已在4月27日前回港，但當日係日本十日黃金假期開始（賀令和天皇登基），大量日本人出外（包括香港）遊覽，福岡飛香港嘅港龍班機逼到爆！此亦好事啫，新上任之旅發局主席彭耀佳在4月23日與傳媒在灣仔福臨門飲茶，講起未來工作要點，就講到港人一年去日本三四次閒閒哋，佢希望香港亦可以做到一年吸引日本遊客來港三四次！
於是乎跟埋肥仔K去九州，在福岡落機，的士去博多駅，搭子彈車到鹿兒島，車程係大約一小時四十分鐘，又快又舒服，上午十時在赤鱲角起飛，日本時間下午六點幾就到咗鹿兒島城山酒店，如港龍可直飛鹿兒島就更加方便。在城山只能住三晚，因為日本本國遊在4月27日大量湧到，房租如海鮮價飛升，不划算。肥仔K話去日本旅行最好避過黃金周長假期，否則住貴啲租車難啲，兼擠逼好多，冇咁好玩；不過，呢次係朋友婚期，（其實亦係揀正黃金周結婚，見到城山酒店有不少婚宴），冇法子，日本人未殺到之前，在酒店浸溫泉十分舒服，一朝天朗氣清，早上七時，浸在露天風呂遙望櫻島火山，邊度想返嚟香港聽湯家驊講廢話吖！